Ístölt Austurland fært í Tjarnarland

Eins og fram kom á dögunum var ísinn á Móavatni ekki í ástandi til ísmóts nú fyrir stuttu síðan. Hagstæð veðurskilyrði hafa þó gert það að verkum að aðstæður á Móavatni við Tjarnarland þykja orðið nógu góðar til mótahalds og tók því mótsstjórn ákvörðun um það fyrr í kvöld að mótið skyldi haldið í Tjarnarlandi eins og undanfarin ár. Mótið verður því EKKI á Eiðavatni eins og auglýst hefur verið í fjölmiðlum.

Eysteinn bóndi í Tjarnarlandi mun útbúa sérstakan malarpúða fyrir inngöngu á ísinn á Móavatn. Ekki verður hægt að leyfa umferð bíla á ísnum fyrir utan dómara- og starfsmannabíla. Við viljum brýna sérstaklega fyrir keppendum að ísinn nærri landi er ekki nægjanlega traustur - en hann er miklu meira en öruggur nokkra metra frá landi. Starfsmenn mótsins ásamt Eysteini bónda gengu um vatnið í dag og boruðu gat á ísinn mjög víða og gengu úr skugga um að hann væri öruggur.

Að þessu sögðu er afar mikilvægt að keppendur séu meðvitaðir um að ríða aðeins á sérmerktu upphitunarsvæði og sjálfri keppnisbrautinni.


Foreldrar og forráðamenn keppenda í unglingaflokki er sérstaklega bent á að ræða þetta við yngri keppendur og bera ábyrgð á því að þau fari eftir settum reglum.

Verum samstillt í því að láta þessar upplýsingar berast - og förum eftir settum reglum, þannig mun þetta takast vel.

---