Okkar fólk

Hér eru tenglar á heimasíður Freyfaxafélaga

Ert þú félagi í Freyfaxa og ert með heimasíðu sem er ekki hér? Vinsamlegast láttu okkur vita.

Austar - Bergur og Hallgrímur

Feðgarnir Bergur Hallgrímsson og Hallgrímur Bergsson ásamt fjölskyldum leggja stund á hrossarækt á Völlum. Hrossarækt þeirra er byggð á gömlum merg og sækja þeir blóð sitt meðal annars úr Ketilsstaðalínu Hallgríms.

Austarsfélagið á hesthús á félagssvæði Freyfaxa í Stekkhólma og hefur félagið m.a. leigt út nokkur pláss í húsinu undanfarin ár. Einnig fara þar að sjálfsögðu fram tamningar og þjálfun hrossa í eigu þeirra feðga.

Finnstaðaholt

Flest okkar þekkja Pétur Behrens og Marietta Maissen sem nú búa á Finnstaðaholti rétt utan við Egilsstaði. Þar leggja þau stund á hrossarækt og listsköpun sem oft á tíðum er byggð á íslenska hestinum.

Lengi vel lögðu þau stund á hrossarækt á Höskuldsstöðum í Breiðdal, hvaðan þeirra þekktustu hross eru kennd við. Í Finnstaðaholti hafa þau byggt glæsilega aðstöðu, hesthús og inniaðstöðu eins best verður á kosið. Þar fara fram frumtamningar, námskeiðahald og fleira slíkt. Þau hafa yfirleitt hross á söluskrá á heimasíðu sinni.

Eiríksstaðir - Ísmyndir - Sonja Krebs

Sonja Krebs hefur tekið hestamyndir á Héraði og víðar í mörg ár. Eftir hana liggur safn ljósmynda úr hestamennsku á Austurlandi, sem vafalaust verður dýrmætur þegar árin hafa liðið.

Á Eiríksstöðum í Jökuldal rækta Sonja og Bragi maður hennar hross í nokkrum mæli, og þjálfar Sonja og temur sjálf. Sonja er með heimasíðuna Ísmyndir.com

Langahlíð

Hallfreður og Gunnhildur reka hrossaræktarbúið Lönguhlíð á Völlum. Þar er ræktað út af Glódísi frá Stóra-Sandfelli, sem gefur hefur margan gæðinginn, þ.á.m. Sædísi frá Stóra-Sandfelli sem fór í glæsidóm sem klárhryssa á sínum tíma og er stolt búsins.

Nokkur hrossa þeirra hafa vakið athygli undanfarin ár í keppni og kynbótasýningum. Má þar nefna Greip frá Lönguhlíð, Hauk frá Lönguhlíð, Ask frá Lönguhlíð og fleiri.

Kollaleira

Hans Kjerúlf og Nikólína reka hrossaræktarbúið Kollaleiru, en Kollaleiruhrossin hafa verið ræktað um áratugaskeið. Þau hafa verið atkvæðamikil tamningum, þjálfun, kynbótasýningum og keppni undanfarin ár. Hans þekkja flestir sem fylgjast með hestamennskunni og er óhætt að segja að hann sé helsti afreksknapi okkar Austfirðinga, enda að baki íslandsmeistara- og landsmótstitlar í tölti.

Hver þekkir ekki Laufa frá Kollaleiru, Braga frá Kópavogi, Sigur frá Hólabaki, Kjerúlf frá Kollaleiru og mörg fleiri hross sem hafa verið ræktuð eða tamin á tamningastöðinni Kollaleiru.

Stormur - Hvammur 2

Á Hvammi 2 á Völlum stunda Melanie Hallbach og Einar Ben Þorsteinsson hrossarækt. Bærinn er nýbýli og liggur að svæði Freyfaxa í Stekkhólma.

Þau hafa stundað hrossarækt í nokkur ár og hafa verið halda 1-2 merum ári.

Stóri-Bakki

Tina og Benni á Stóra-bakka hafa stundað hrossarækt, hestasölu og tamningar á Stóra-Bakka í nokkur ár. Þar hafa þau byggt glæsilega aðstöðu á skömmum tíma. Fyrir utan tamningar, sölu og þjálfun bjóða þau upp á vetrarbeit, hagagöngu og hafa undanfarin ár verið á stóðhestahaldi á sumrin.
_
Einnig hafa þau verið dugleg í ferðaþjónustu og boðið upp á bændagistingu og styttri hestaferðir.

Víðivellir fremri - Sveinatunguhross

Í Fljótsdal eru Víðivellir fremri. Þar stundar fjölskyldan hrossarækt af kappi, auk þess sem þau frumtemja og þjálfa eigin hross oft á tíðum. Á heimasíðu Víðivalla fremri segir m.a.:

"Ræktunarmarkmið á Sveinatunguhrossum felst í því að rækta góða og viljuga gæðinga, mjúka á öllum gangi, þannig að þau séu góð reiðhross. Með ræktuninni reynum við að þróa betri byggingu og halda í og bæta hæfileika þessara hrossa. Sveinatunguhrossin eru ræktuð af Jósef Valgarð Þorvaldssyni, föður hans Þorvaldi Jósefssyni og þeirra fjölskyldum. "